Немис инвесторлар билан пахта пўстлоғини қайта ишлаш бўйича ҳамкорлик

Фарғона вилоятида қишлоқ хўжалиги ва қайта ишлаш саноатини ривожлантириш мақсадида вилоят ҳокими Хайрулло Бозоров Германиянинг “Alcon Девелопмент ГмбҲ” компанияси бош директори Зия Газиев ва унинг ҳамкори Куреши Ахсан Рашид билан учрашув ўтказди.
Учрашувда вилоятнинг инвестиция салоҳияти, географик афзалликлари ва саноат ҳамда қишлоқ хўжалиги соҳаларини ривожлантириш имкониятлари муҳокама қилинди. Асосий эътибор пахта етиштириш ва унинг пўстлоғини қайта ишлаш орқали қўшимча қийматли маҳсулот яратишга қаратилди.
Немис инвесторлар пахта пўстлоғидан замонавий пиролиз технологияси ёрдамида био-кўмир ишлаб чиқариш лойиҳасини тақдим этди. Томонлар лойиҳа иқтисодий самарадорлиги, экологик хавфсизлиги ва чиқиндиларни қайта ишлаш имкониятларини муҳокама қилиб, қўшма ишларини амалга ошириш чораларини келишиб олди.
“Alcon Девелопмент ГмбҲ” компанияси асосан инфратузилма ва барқарор энергетика лойиҳалари билан шуғулланади.
