Ўзбекистон ва Германия: тўқимачилик соҳасида уч йиллик муваффақиятли ҳамкорлик

Халқаро ҳамкорликни ривожлантириш йўлида яна бир муҳим натижа қайд этилди. Дунё ахборот агентлиги маълум қилишича, “Масче” журналида Германия ва Ўзбекистон ўртасида тўқимачилик саноати бўйича уч йил давом этган “ГУЗ Партнерс” қўшма лойиҳаси якунлари эълон қилинди. Ушбу лойиҳа икки мамлакат ўртасидаги ҳамкорликни янада мустаҳкамлади.
Лойиҳа доирасида Ўзбекистоннинг турли ҳудудларидаги корхоналарда тренинг ва семинарлар ташкил этилди. Натижада корхоналар Европа, айниқса Германия бозори талабларига мослашди, экспорт имкониятлари ҳамда маҳсулот сифати сезиларли даражада яхшиланди.
Фарғона вилояти лойиҳа учун намунавий ҳудудга айланди, Қашқадарё вилояти эса иккинчи пилот ҳудуд сифатида босқичма-босқич ривожланмоқда. Лойиҳа икки давлат ҳукуматлари томонидан қўллаб-қувватланиб, уни 2026-йилда ҳам давом эттириш режалаштирилган.
Умуман олганда, бундай лойиҳалар Ўзбекистон тўқимачилик саноатининг халқаро бозордаги мавқеини мустаҳкамлашга ҳамда хорижий ҳамкорлик кўламини кенгайтиришга хизмат қилмоқда.
